Google Authenticator апликацијата конечно добива една функција која требаше да ја има одамна, која барањата од корисниците направи да биде воведена и е достапна кај конкурентите со години.
Се работи за можноста за синхронизирање со „облакот“, поточно со Google сметката на корисникот и со тоа кодовите кои ги чува апликацијата лесно да може да се префрлат на друг уред.
Проблемот со ваквите апликации е што доколку уредот е изгубен, украден или едноставен заменет со друг, кодовите кои се чуваат мора повторно да бидат наместени од страните на кои се користат, а тоа подразбира деактивирање на дво-факторската автентикација и нејзино повторно вклучување.
Со синхронизирањето на серверите од компанијата, тие се чуваат таму, наместо на уредот од корисникот, па замената на уредот подразбира само едноставно инсталирање на апликацијата и најавување со Google сметката.
За потсетување, Google Authenticator е апликација која генерира еднократни кодови кои се користат за најавување на сервиси и веб страни на кои е вклучена функцијата дво-факторска автентикација. Користењето на дво-факторска автентикација, а посебно со помош на вакви апликации, наместо со SMS кодови, се смета за една од поважните практики кои се препорачуваат за корисниците.
Важноста на оваа практика се гледа и преку одлуката на Google од 2021 година да ја вклучи дво-факторската автентикација за сите свои корисници, односно веќе не овозможува користење само на лозинка за најавување.
Еден од поголемите конкуренти на Google со ваква апликација е Microsoft и нивната Microsoft Authenticator апликација. Оваа апликација веќе одамна овозможува синхронизирање на кодовите, а од пред две години овозможува и пристап до лозинките кои се зачувани во Microsoft сметката, во главно преку Edge.
