Најпопуларната социјална мрежа во светот последниве неколку месеци има цел да се натпреварува со најпопуларниот веб сајт за видео, YouTube. Како? Преку автоматско пуштање на видеа додека одите надолу по timeline-от, односно новостите на македонски и преку пуштање известувања на секој корисник кога некој пренесува видео во живо.
Да, точно е дека видеата во живо заедно со известувања се одличен начин на Facebook страните подобро да пристапат до своите гледачи и читатели, но навистина, кој сака редовно потсетување дека некој има видео во живо? Овие видеа станаа толку популарни, што ги користат дури и некои приватни корисници! И за сите овие видеа, вие редовно добивате известувања, кои да бидеме реални, ретко кој ги кликнува. Сите се надеваме дека звукот е некој нов „лајк“ или коментар.
За среќа, има прилично лесен начин како да ги исклучите овие известувања и да намалите редовно одземање на вниманието.
Првиот, полесен начин е следниов:
1. Кликнете на овој линк, кој треба да ве однесе до страната каде ќе може да ги направите промените
2. Одете во Live Videos секцијата (исто е и кај оние кои го имаат Facebook на македонски)
3. Во паѓачкото мени во десниот дел одберете All Off за целосно исклучување или Suggestions Off за известувања од видеа кои не се од вашите пријатели
Доколку линкот погоре не работи, ќе треба сами да пристапите до поставките за известувањата. Тоа ќе го направите на следниот начин:
1. Кликнете на стрелката во горниот десен агол (последна на синото Facebook заглавие)
2. Изберете “Settings” (Англиски) или „Поставки“ (Македонски)
3. На страната за поставки изберете “Notifications” или „Известувања“
4. Потоа кликнете на “On Facebook” или „На Facebook“
5. Подолу ќе се наоѓа опцијата за исклучување на известувањата од Live Videos, односно видеата во живо
Засега, мобилните Facebook апликации за Android, iOS и Windows 10 Mobile не нудат можност за менување на поставките за “Live videos” (иако нудат можност за менување на поставките за други известувања), па сето ова ќе мора да го направите од компјутер.
