Stack Overflow долго време беше незаменлив ресурс за милиони програмери ширум светот, место каде што секојдневно се поставуваат илјадници прашања за код, грешки и најдобри практики. Но, најновите податоци покажуваат драматична промена. Во декември 2025 година, на платформата биле поставени само 3.862 нови прашања. Тоа претставува пад од 78% во однос на истиот месец минатата година, а трендот на опаѓање трае веќе неколку години.
За споредба, на врвот од функционирањето на страната во 2014 година, Stack Overflow примаше над 200.000 прашања месечно. Сега, по серија на остри падови, платформата изгледа како да губи централна улога во секојдневието на програмерите.
Еден од главните виновници за овој пад е брзиот развој на вештачката интелигенција. Современите ВИ алатки, интегрирани директно во развојните околини (IDE) како VS Code, JetBrains или Cursor, им овозможуваат на програмерите да добијат брзи одговори без да треба да го отворат прелистувачот. Плус, овие алатки не ги критикуваат за „глупави“ прашања – за разлика од некои строги модератори на Stack Overflow.
Многу корисници долго време се жалат на „непријатната“ атмосфера во заедницата. Строгите правила за квалитет на прашањата често резултираат со затворање или бришење на теми, што ги фрустрира почетниците и искусните програмери. Еден коментар од Reddit совршено ја опишува ситуацијата: „ВИ го забрза падот, но ова е резултат на години на казнување на корисниците што сакаат да учествуваат. Луѓето конечно добија алатка што не им вели дека нивните прашања се глупави.“
Дополнително, големите технолошки компании како Google, Microsoft и AWS нудат сопствени сервиси со генеративна вештачка интелигенција (како GitHub Copilot или Gemini) кои ги задржуваат корисниците во нивните екосистеми и не ги праќаат на надворешни веб страни.
Самиот Stack Overflow се обидува да се прилагоди со лансирање на Stack Overflow AI Assist, алатка базирана на нивните податоци.
Сега, логично, постои загриженост дека идните генерации на ВИ модели ќе имаат помалку квалитетни податоци за тренирање, бидејќи Stack Overflow беше богат извор на детални, проверени одговори од експерти.
Сепак, јасно е дека начинот на кој програмерите бараат помош се менува неповратно. Stack Overflow останува вреден архив на знаење, но за секојдневни проблеми, ВИ е новиот крал.
