Софтверскиот гигант Microsoft е можеби најпознат по Windows и Office, но со претставувањето на Surface серијата на уреди станаа прилично успешни и на хардверскиот фронт. Тие сега најавија нов хардвер, кој ќе биде претставен на 26 oктомври и според она што го знаеме досега, на настанот ќе видиме нови уреди, а не наследници на актуелните Surface Pro 4 и Surface Book.
Скоро е сигурно дека Microsoft ќе претстави Surface „се во едно“ компјутер, односно компјутер чии компоненти се наоѓаат директно во мониторот. Овој компјутер најверојатно ќе биде насочен кон уметниците и креаторите, што значи дека може да се очекува дисплеј на допир и поддршка за дигитално пенкалце, како и механизам кој би можел да ги постави големите монитори во легната положба за да се овозможи полесно цртање.
Покрај тоа, очекувам Microsoft да ги освежи Surface Pro 4 и Surface Book со најновата генерација на Intel Kaby Lake процесори, но не и да претстави целосно нови модели. Сепак, многу е возможно тие да претстават и некое изненадување, бидејќи со Surface Book покажаа дека особено добро знаат да сокријат какви производи развиваат, односно скоро и да нема протекувања низ интернетот за нив.
На настанот веројатно ќе дознаеме и повеќе за иднината на Windows 10 Mobile, кој според мене не е воопшто мртва платформа и има многу простор за развој, а сигурно ќе бидат претставени и неколку придружни уреди, како тастатура и маус за „се во едно“ Surface компјутерот. Како и да е, ние будно ќе ги следиме сите случувања околу овие уреди и ќе се погрижиме навремено да дознаете за нив.
Извор: Venture Beat, PC World, The Verge
