На почетокот од годината Марк Гурман најави дека Apple планира да го претвори Siri асистентот во „четбот“, со оглед на популарноста на ChatGPT и другите. Оваа најава претставува промена на плановите на компанијата која не сакаше да оди во тој правец со Siri, но очигледно пазарот ги бара тие промени.
Сега Гурман излезе со нови информации за развојот на Siri, па со оглед на тоа што тој ретко објавува непроверени информации, може да се каже дека добиваме претстава што може да се очекува од Apple на овој план.
Во основа, Siri со iOS 27 ќе може да се користи и како посебна апликација, а тоа е направено поради планот да може да се користи и како „четбот“. Сепак, разговорите со Siri не би биле баш практични доколку не се во форма на посебна апликација преку која ќе можат да се видат и претходните разговори.
Според информациите, Siri ќе добие целосен редизајн, а разговорите во посебната апликација би биле со кориснички интерфејс сличен на Messages апликацијата.
Во оваа форма, Siri ќе може да ги прави сите работи кои се карактеристични за „четботовите“, односно ќе може да пребарува преку интернет, да сумира страни и документи, а ќе може и да прави анализи и измена на документите.
Siri наводно се планира да биде интегрирана и во Spotlight, па и оваа позната функција ќе биде унапредена со подобрена можност за пребарување.
Покрај новата и посебна апликација за Siri, како и целосно нови анимации и дизајн, се најавува и дека Siri ќе биде интегрирана во „динамичниот остров“, па корисниците ќе имаат дополнителен начин за брз пристап до разговорите.
Siri се очекува дека ќе ги добие и веќе најавените функции, како што е интеграција со апликациите, „свесност“ за што е тоа што се прикажува на екранот и можност да извршува активности во име на корисникот.
Дел од овие функции се очекуваше дека ќе бидат пуштени со iOS 26.4, но таа верзија веќе неколку недели се тестира, а вчера беше и официјално пуштена, па ќе видиме дали ќе има нешто со првата бета верзија од iOS 26.5.
Официјално за сите овие информации ќе дознаеме во рамките на WWDC 2026 конференцијата која Apple ја закажа за 8 јуни.
