Неколку од најпознатите компании во светот како Google и Facebook најавија дека на своите вработени ќе им овозможат да работат од дома до крајот на годината, додека Twitter реши да на тие што ќе изберат да им овозможи да работат од дома цело време и по завршувањето на состојбата со COVID-19.
Овој пример нема да го следат од Apple, па според извори на Bloomberg, од компанијата ќе почнат постепено и во фази да ги враќаат вработените во канцелариите. Ова ќе важи за сите канцеларии кои ги има компанијата низ светот и низ САД, вклучувајќи ја и централата во Купертино.
Според информациите до кои дојде Bloomberg, во првата фаза ќе бидат опфатени вработени кои не можат да работат од дома или тоа не е баш лесно изводливо. Оваа фаза веќе е почната во одредени региони, а ќе продолжи во поголемите канцеларии при крајот на мај и почетокот на јуни.
Втората фаза која е планирана за јули, ќе почне да ги враќа на работа повеќето вработени, а ова сепак ќе зависи и од развојот на настаните и одлуките на властите во различните региони.
Apple веќе почна да ги отвара продавниците во одредени градови, а во нив ќе важат одредени правила, како на пример ограничување на бројот на посетители кои може да бидат внатре во еден момент.
Причината поради која од Apple планираат да ги вратат голем дел од своите вработени во канцелариите е тоа што од компанијата во голем дел работат со развој и дизајн на хардвер, нешто по што се познати, а посебно стилот на работа. Ова не може да се изведе додека вработените се дома, а единствениот дел од вработените кои сепак би можеле подолго да работат од дома се програмерите.
