Alphabet, за потсетување, е компанија која ја создадоа основачите и директорите на Google, да служи како една главна компанија под која ќе бидат Google, меѓутоа и останатите бизниси кои веќе станаа премногу за да не прераснат во посебни бизниси. Тоа значи дека Google како компанија продолжи да работи специјално на своите бизниси, додека другите започнати проекти и технологии, се издвоија како посебни компании, сите под капата на Alphabet.
Loon и Wing се две нови компании кои ќе функционираат под Alphabet. Тие досега беа дел од таканаречениот X сектор во компанијата којшто може да се нарече еден вид на инкубатор внатре во компанијата наменет за развој на одредени проекти и технологии.
Овие два проекти се имаат покажано како успешни и во доволно ниво на развој, па прераснуваат во посебни компании, со сопствени директори и буџети. Ова исто така значи дека тие ќе почнат да функционираат комерцијално, односно ќе треба да почнат да носат профит.
Loon е компанија која ќе се занимава со овозможување на интернет на места каде моментално го нема, користејќи балони во атмосферата на Земјата. Ова не би била единствената компанија која развива ваква технологија, но изгледа ќе биде првата која комерцијално ќе почне да го прави тоа.
Wing од друга страна е компанија која работи на развој на дронови, односно беспилотни летала за достава, како и дронови кои би се користеле во сообраќајот, односно за креирање на платформа за регулирање на истиот.
Овие две компании стануваат рамноправни со Google, Waymo, Verily и други.
