Поголемите 3,5 инчни надворешни хард дискови навистина нудат големи капацитети за зачувување на податоците, но се прилично бескорисни кога сте со лаптоп на пат, бидејќи мора да се приклучат преку адаптер во струја, покрај стандардното поврзување со USB со компјутерот.
Seagate има ново решение – Innov8 хард дискот се поврзува само преку USB Type-C приклучок, што го прави одлично решение за оние кои работат со преработка на видео на својот лаптоп, бидејќи за таа работа треба многу простор.
Да потсетиме, USB Type-C приклучокот овозможува многу побрз пренос на податоци, повисок напон за напојување на уредите и можност за пренос на Ultra HD 4K видео преку посебен адаптер со Display Port.
Innov8 има капацитет од 8 TB, што е веројатно и повеќе од доволно за поголемиот број на корисници – од Seagate велат дека капацитетот е доволен за 800 HD филмови, 4 милиони фотографии и преку 2 милиони песни.
Овој диск секако дека нема да може да понуди SSD брзини на запишување и вчитување на датотеките, но барем се поврзува со USB 3.1 Type-C приклучок, кој овозможува многу високи брзини на пренос.
На крај, не може да остане незабележан и дизајнот на Seagate Innov8, кој овозможува поставување на дискот и вертикално и хоризонтално, како и изработката од алуминиум, која прави да изгледа скапо и луксузно. Дизајнот е добитник и на Red Dot наградата за 2016 година во неговата категорија.
Цената на Seagate Innov8 изнесува 349 долари во САД, а во неа се вклучени и 200 GB слободен простор на “Cloud” платформата на Microsoft, OneDrive.
Извор: Mac Rumors, The Verge, Digital Trends
