Дека Microsoft планира унифицирање на неколкуте апликации за имејл и календар што ги има, со една нова и модерна, можевме да прочитаме уште во 2021. Новата апликација, која едноставно се нарекува Outlook, односно новиот Outlook засега, започна да се тестира минатата година, а оваа веќе е доволно развиена да корисниците можат да ја користат како главна апликација за сите нивни имејл и календар потреби.
Новата апликација може да се симне преку Microsoft Store, но најдобро е да се вклучи преку „старата“ Outlook апликација за десктоп или преку Mail и Calendar апликациите преку достапниот „преклоп“.
Оваа нова апликација ќе стане стандардна и ќе доаѓа со сите нови уреди со Windows 11, почнувајќи од 2024, на местото на сегашните Mail и Calendar апликации. Овие апликации ќе продолжат да функционираат и ќе може да се симнат преку Microsoft Store до крајот на 2024.
Новата апликација е направена на основа на веб апликацијата која до минатата година можеше да се види само на Outlook.com. Истата е со модерен код, дизајн, а овозможува и подобра безбедност. Тука се и напредните можности за пребарување на пораките, како и доста функции кои постепено се додаваат.
