Еден од најпознатите производители на лаптопи, Acer, претстави неколку нови модели на лаптопи и таблет/лаптопи, кои опфаќаат широк опсег и нудат високи перформанси по прилично ниска цена.
Најинтересен е Switch Alpha 12, клон на Microsoft Surface Pro 4, кој има 12 инчен дисплеј со резолуција од 2160х1440 пиксели и посебна тастатура, што значи дека може да се користи и само како таблет. Уредот има и дигитално пенкалце, а во внатрешноста може да се конфигурира со Core i3, i5 и i7 процесори и 4 GB рам, односно 128 GB SSD диск.
Негов главен адут е тоа што има водено ладење, што значи дека нема физички кулери и е исклучително тивок. Уредот има и Real Sense 3D камера во предниот дел за препознавање на корисникот за полесно отклучување со Windows Hello. Цената почнува од 599 долари, што е многу поповолно од останатите вакви уреди, особено ако се земе во предвид фактот дека тастатурата е вклучена во пакувањето.
Вториот уред со Windows 10 е новиот Aspire S 13, кој е класичен ултра тенок лаптоп со високи перформанси. Овој модел доаѓа со дисплеј со големина од 13,3 инчи и Full HD резолуција, како и можност за дисплеј на допир. Процесорите се Core i3, i5 и i7, а лаптопот може да се конфигурира максимално со 8 GB рам и 512 GB SSD диск.
Батеријата на стандардниот модел трае 9 часа, но со доплата може да се добие модел со поголема батерија, која трае 13 часа со едно полнење. Лаптопот тежи само 1,4 килограми и е дебел само 14,4 милиметри, а ќе чини 699 долари за почетниот модел, што е исто така поповолно од главните конкуренти.
Acer претстави и нов Predator 17X гејминг лаптоп, кој има супер моќни компоненти – Core i7 6820HK процесор, до 64 GB рам меморија, до Nvidia GTX 980 графичка картичка (моќната десктоп верзија) како и 3 SSD дискови во RAID 0 конфигурација. Дисплејот има големина од 17,3 инчи и 4K резолуција, но компонентите се доволно моќни и за играње на Oculus Rift и HTC Vive виртуелните уреди. Импресивно. Цената почнува од 2.799 долари за почетниот модел.
Покрај Windows 10 лаптопите, Acer не ја заборави и Chrome OS линијата, со новиот Chromebook 14, кој тие велат е најмоќниот ваков нивни Модел досега. Лаптопот има 14 инчен дисплеј, процесори од Core “i” серијата, батерија која трае 12 часа со едно полнење и тастатура отпорна на истурање на течност. Acer особено ја нагласува робусноста во изработката – Chromebook 14 може да издржи 60 kg тежина над него, како и паѓање на од височина од 45 сантиметри без да се оштети.
Извор: GSM Arena 1, 2, 3, 4, Windows Central, Windows Blog
