На настан кој што се одржа денеска во Парис, Huawei го претстави својот најнов модел предводник во класата, наследник на P6 моделот, Ascend P7. Како и претходниот тој се одликува со одличен и тенок дизајн, доста мала тежина и е направен од комбинација на алуминиум и стакло. Она што е интересно и претставува главна карактеристика е предната камера која што има 8 мегапиксели и е со широк отвор, со што од Huawei се надеваат дека ќе ги привлечат актуелните љубители на selfie сликите.
Huawei Ascend P7 доаѓа со димензии од 139,8 x 68,8 x 6,5 mm и тежина од само 124 грама. Чисто за споредба, Galaxy S5 од Samsung тежи 145 грама, а iPhone 5s 112, но сепак тој е и помал за цел инч. Од другите карактеристики, P7 доаѓа со четири јадрен процесор кој што работи на 1,8 GHz, 2GB RAM меморија и 16GB вградена меморија која што може да се надгради со SD картичка. Екранот е со големина од 5 инчи и Full HD резолуција од 1920 x 1080 пиксели. Задната камера е со 13 мегапиксели и е направена од страна на Sony, а предната како што веќе напишавме е со 8 мегапиксели. Телефонот работи на најновата верзија од Android оперативниот систем, 4.4 KitKat, врз кој што е поставен Emotion 2.3 корисничкиот интерфејс од Huawei. Батеријата е поголема од неговиот претходник и P7-цата ќе доаѓа со батерија од 2500 mAh.
Huawei Ascend P7 треба да започне да се продава во Европа, Азија и Средниот Исток по цена од 449 евра без договор кај некој од операторите.
