Тоа што дури и кинеските производители на паметни телефони сакаат да влезат во таблет/лаптоп сферата со Windows 10, само дополнително дава тежина на успехот на Surface серијата на Microsoft. Сега и Huawei најави дека има спремно таков уред за MWC во Барселона, кој ќе има многу слични можности како Surface Pro 4 на Microsoft и iPad Pro на Apple.
Имено, како и конкурентот од Microsoft и Matebook на Huawei ќе биде таблет кој ќе може да се прикачи на тастатура и кој ќе има вградено дигитално пенкалце за уметниците, но и за сите оние кои сакаат да фаќаат брзи забелешки на својот таблет. Од првата фотографија не може да се види колкав дисплеј ќе има уредот, но моја претпоставка е дека ќе биде во рангот од 12 инчи.
Исто така, нема ниту најава за тоа каков процесор ќе има вградено во Matebook, но не очекувам Huawei да вгради чипови од Intel Core “i” серијата како во Surface Pro 4, туку веројатно од Core m или Atom серијата како во Surface 3 (и најавениот Surface 4). Oд изборот на процесорот во големо ќе зависи и цената на уредот, а бидејќи се работи за Huawei, таа треба да биде многу пониска отколку на останатите производители – затоа и очекувам дека тоа ќе биде Atom чип.
Matebook таблет/лаптопот ќе има вграден Windows 10 оперативен систем, а има и најави дека ќе има можност за “dual boot” со Android оперативен систем, особено бидејќи се работи за бизнис модел и би имало смисла корисниците да имаат пристап до компјутери со мноштво програми и таблет со мноштво апликации во истиот уред.
Извор: Gizmodo, Tech Times, Digital Trends
