Иако се’ уште не е потврдено од страна на Apple, а тоа ќе се случи за време на претставувањето, се очекува дека iPhone 15 серијата веќе нема да го користи Lightning приклучокот од компанијата, туку подобриот и од сите користен USB-C.
Ова е голема промена за корисниците на iPhone, кои останаа единствени кои мораат да имаат посебни кабли за полнење, па дури и другите уреди од Apple користат USB-C.
Извори на 9to5Mac, најавуваат дека промената на USB-C ќе донесе и поголеми брзини на полнење на iPhone кои сега одат до максимум 27W. Новата максимална брзина на полнење треба да биде 35W, колку што е и најсилниот полнач од компанијата моментално достапен.
Тоа што не е сигурно е дали оваа брзина ќе ја добие целата iPhone 15 серија или само iPhone 15 Pro моделите. Веќе можевме да прочитаме дека основните модели ќе имаат одредено ограничување на USB-C портата, па ако тоа се покаже како точно, 35W ќе добијат само Pro моделите.
Како и да е, ова не е баш голема брзина ако се спореди со конкурентите кои веќе одат и до 240W, a стандардно може да се земе некој просек од 45-65W, но сепак не е мала новина за корисниците на iPhone.
iPhone 15 серијата се очекува дека ќе биде претставена на 12 септември, но од Apple се’ уште немаат почнато со испраќање на поканите.
