Флексибилните екрани минатата година станаа популарни со најавите и шпекулациите за разни уреди кои требаше да може да се превиткуваат, преклопуваат и слично. Меѓутоа кога на крајот беа претставени првите уреди со до некаде превиткани екрани, можеше да се види дека технологијата сепак се’ уште е во развој и ќе треба време додека видиме нешто навистина различно на пазарот, нешто што ќе може да воведе нов видови на уреди и начин на нивно користење. Уредите кои што официјално беа претставени минатата година кои што може да се каже дека ја најавуваат технологијата на заоблени екрани беа LG G Flex и Samsung Galaxy Round.
Според неофицијални информации, Samsung планира да претстави уред со големина од 7 до 8 инчи кој што ќе може да биде превиткан на три места. Ова ќе овозможи уредот да може да се користи во различни форми, а со тоа да замени неколку уреди. Поточно кога е целосно отворен ќе може да се користи како таблет компјутер, а кога ќе биде превиткан како мобилен телефон. Повеќе детали околу овој уред нема, а се очекува да биде претставен дури идната година, па значи дека ќе причекаме да видиме дали има нешто вистина во овие тврдења.
Ваквите уреди, кога технологијата зад нив доволно ќе биде развиена, ќе претставуваат еден вид на револуционирање на начинот на кој што ги користиме нашите телефони и таблет компјутери денес. Сличен концепт беше претставен и од страна на канадскиот Queens Универзитет за кој што можевте да прочитате минатиот месец.
Извор: Android Authority
