GeoRush е мобилна апликација достапна за Android и iOS уредите, чија основна намена е едукација и тестирање на познавањата од областа на географијата. Истата е развиена од страна на Дарко Петковски, кој стои зад развојот на Автошкола – Возачки испит апликацијата за која веќе пишувавме.
Се работи за квиз игра која е дизајнирана да овозможи брзо одговарање на прашања, при што корисниците собираат поени врз основа на нивната брзина и точност. Апликацијата е наменета за корисници кои сакаат да го проверат или прошират своето знаење за државите во светот, нивните знамиња и главни градови.
Основата на играта се состои од неколку различни режими. Во класичниот квиз, играчите добиваат прашања поврзани со препознавање на знамиња, главни градови и имиња на држави. Покрај стандардниот формат, апликацијата вклучува и режим со мапа каде од корисниците се бара да ја лоцираат точната позиција на одредена држава на светската карта.
Секој точен одговор носи поени, а брзината на одговарање е клучен фактор за остварување на повисок резултат во „брзинскиот“ режим.
Дополнително, вклучени се и дневни предизвици преку кои играчите можат континуирано да го тестираат своето знаење.
Една од специфичните карактеристики на GeoRush е поддршката за локално играње со повеќе играчи. Корисниците можат да ги поврзат своите уреди преку Bluetooth и да се натпреваруваат во реално време, без потреба од активна интернет врска.
Оваа можност ја прави апликацијата практична за користење за време на патувања или во средини каде што нема пристап до мрежа.
Системот за рангирање во GeoRush е поделен на две нивоа. Секој корисник има личен профил каде се бележи неговиот најдобар резултат, но истовремено освоените поени придонесуваат кон вкупниот пласман на неговата држава на глобалната листа. Секој освоен поен има влијание и на личниот и на националниот рејтинг.
Апликацијата може бесплатно да се преземе од платформите Google Play за корисниците на Android, како и од App Store за корисниците на уредите од Apple.
