Една од најпознатите функции на паметните телефони на Google, Now Playing, официјално пристигна како самостојна апликација на Play Store. Досега, оваа корисна алатка беше интегрирана директно во оперативниот систем преку Android System Intelligence, работејќи тивко во позадина за да ја идентификува музиката што свири во околината и да го прикаже името на песната на „заклучениот екран“ на Pixel уредите.
Со најновата промена, Google одлучи да ја одвои функцијата во посебна апликација, нудејќи им на корисниците подобар преглед и поголема контрола врз самата алатка.
Новата апликација ја задржува својата основна функционалност за автоматско препознавање музика без потреба од интернет конекција, но донесува освежен кориснички интерфејс.
Покрај тоа, вклучен е и посебен дел за историја каде што може да се прегледаат претходно идентификуваните песни, да се менаџира листата и директно да се отворат песните преку сервисите за стриминг на музика како Spotify или YouTube Music.
Ова го прави целото искуство поинтерактивно во споредба со досегашниот систем кој главно се потпираше на известувања.
Иако појавувањето на апликацијата на Play Store може да сугерира дека таа станува достапна за поширок спектар на уреди, тоа не е случај. Според техничките ограничувања и податоците од самата продавница, Now Playing останува строго ексклузивна за Pixel екосистемот и не може да се инсталира на паметни телефони од други производители, како што се уредите на Samsung, Xiaomi или Motorola.
Преку овој потег, Google само го олеснува процесот на ажурирање на самата алатка и нејзиниот интерфејс, што сега ќе се одвива преку Play Store независно од големите софтверски надградби на целиот оперативен систем.
Тоа што сепак се надеваме е дека апликацијата ќе им стане достапна и на другите Android уреди, а не само на Pixel, нешто што Google не ретко го има направено со други функции и апликации со тек на време.
