Google вчера, покрај Pixel 8 и Pixel 8 Pro телефоните, ја претстави и втората генерација од нивниот Pixel Watch. Часовникот од Google, иако нов, има доста добри оценки и доволно голема популарност за да конкурира со најпознатите на пазарот.
Pixel Watch 2 нема некоја посебна разлика во изгледот во споредба со ланскиот модел, но тоа е очекувано. Оваа година уредот е направен од 100% рециклиран алуминиум, со што се добива 10% помала тежина. Тркалцето за навигација е нешто поголемо и повеќе споено со телото од уредот.
Како главна новина се истакнува новиот чип кој треба да овозможи подобри перформанси, а со тоа и нови и подобри фитнес мерки. Батеријата се истакнува дека треба да издржи до 24 часа со вклучен „always-on“ екран, а полнењето до 50% се прави за 30 минути.
Часовникот добива три нови сензори кои овозможуваат доста поточно мерење, па од Google истакнуваат дека заедно со нивниот ВИ алгоритам мерењето на вежбањето е 40% поточно.
Google посебно ја истакнува и новата можност за мерење на стресот кај корисниците, а истата е донесена од FitBit и е наречена Body Response.
Pixel Watch 2 добива и работи како Heart Rate Zone Coaching и Pace Training, а додадени се и подобрувања кај мерењето на спиењето.
Нови безбедносни функции се исто така дел од новата генерација од Google часовникот, а тие можевме да ги видиме пред некој месец како дел од iOS 17 надградбата.
Корисниците можат да ги известуваат своите најблиски кога ќе пристигнат на некоја локација, а тука се и функциите како Medical ID.
Pixel Watch 2 доаѓа и со новини кои се поврзани со Wear OS 4, а тие вклучуваат новини како подобрен систем за известувања, а тука се и подобрени можности за прилагодување на изгледот на системот.
