Jacquard™ by Google е бренд од оваа компанија преку кој тие претставуваат, кратко кажано, облека и слични производи кои се за носење, надградени со технологија, за ова паметно време. Тоа од компанијата го прават преку вградување на мал уред кој во основа реагира на неколку гестикулации, со што корисниците добиваат можност да го контролираат својот мобилен, преку нивната јакна, на пример.
Од компанијата преку овој бренд продолжуваат со претставување на производи кои досега и не сме помислиле дека може да ги ставиме во категоријата на паметни. Konnect-i паметен ранец кој е направен од страна на познатиот бренд за вакви производи, Samsonite.
Konnect-i доаѓа во две верзии, што се однесува до големината и можноста за ставање на работи. Од тоа што може да се види, се работи за ранец којшто може да собере лаптоп, апарат за сликање, како и уште неколку додатни работи, што го прави одличен за тие кои често работат на терен.
Тоа што го прави паметен Konnect-i е малиот уред додаток којшто е карактеристичен за Jacquard™ by Google брендот. Овој уред се поставува на едното од ременчињата за носење, на кое е вграден и сензор.
Корисниците потоа можат да повлечат надолу, нагоре, да стиснат два пати или да задржат врз ременчето, по што се испраќа командата на телефонот.
Преку апликацијата која се поврзува со уредот од Google, се избира која команда што да прави, а изборот и не е така мал, односно корисниците можат да ја контролираат музиката, да одговараат на повици, вибрира при повици и известувања и многу други работи.
