Меѓу најинтересните производи и геџети кои што ги имаме видено, се тие претставени на некоја од платформите за групно финансирање како Kickstarter или Indiegogo, како што е случајот со денешниот.
WonderCube е наречен производот и е наменет да им овозможи на корисниците еден мал уред да ги покрие сите основни потреби во денешниот мобилен свет. Уредот кој што е во форма на коцка е со големина од еден кубен инч, односно 2,5 сантиметри и може да се носи на привезокот со клучевите. Треба да замени неколку други производи кои што корисниците често ги користат за разни намени, односно тој претставува USB/Lightning кабел за полнење, држач за поставување на мобилниот на маса, дополнителен простор за складирање на податоци, читач за flash мемориски картици, дополнителен извор на енергија, како и батериска ламба.
Сите овие функции уредот ги има вградено во себе и до нив се пристапува со отворање на уредот од различните страни. Некои од функциите работат моментално само со Android уредите, како што е на пример USB OTG пристапот до фајловите, но се најавува поддршка и за iOS во иднина.
Интересен дел од уредот е можноста за полнење на мобилниот со користење на оние старите правоаголни батерии, кои што најчесто ги користевме во играчките со автомобили и слични. WonderCube има конектори за овој вид на батерии, а по полнењето според развивачите, може да се добијат дополнителни 3-4 часа на користење на мобилниот.
WonderCube може да се нарача преку Indiegogo за цена од 49 долари, па нагоре, зависно од периодот на нарачка. Доставата е планирана за ова лето доколку кампањата биде успешна, за што се потребни 50.000 долари, а досега се собрани нешто повеќе од 21.000 на повеќе од месец дена до истекот на рокот.
Извор: Indiegogo, WonderCube
