Денеска можеше да се види, иако е познато, колку важен дел од интернетот е Google. Околу еден час пад на системите придонесе да не функционираат повеќето нивни сервиси како YouTube, Gmail, Docs и слични, а корисниците во целиот свет го забележаа тоа и реакциите се едни од поголемите во текот на денот.
Од Google го потврдија проблемот, но не објавија што точно го има предизвикано, а тој веќе е решен и корисниците не би требало да имаат проблем со пристапување до сервисите од оваа компанија.
Сервисите од Google се основа и за доста други сервиси, па забележано беше дека не функционирале одредени уреди од паметниот дом, односно истите не можеле да бидат контролирани преку Google Assistant. Тука е и играта Pokemon Go која имала проблем со функционирање за време на падот на сервисите од Google.
Без разлика на големината на падот, сепак Google Search остана функционален, како и рекламите кои се прикажуваат преку мрежата на компанијата.
