Од утре започнува пуштањето на годишната поголема надградба која Windows стандардно ја добива во есен. Како дел од не така малата листа на новости е и една поврзана со безбедноста на интернет преку конечното „пензионирање“ на лозинките.
Ова е нешто што со години е во изработка, а поддршка има од сите поголеми ИТ компании, што значи може да се користи на било која платформа.
Се работи за таканаречените „passkeys“ кои овозможуваат најава на сервисите, апликациите, системите без лозинка, туку само преку потврда на идентитетот на корисникот и некоја од биометриските автентикации кои веќе се користат.
Windows 11 од утре добива целосна поддршка за „passkeys“. Тоа значи дека корисниците ќе можат да креираат вакви клучеви од страните и сервисите кои имаат поддршка за нив, да ги чуваат и користат за најавување.
Поради овој додаток, во Settings > Accounts сега е додаден нов дел „Passkeyes“, преку кој корисниците ќе можат да ги гледаат сите нивни креирани клучеви и да ги бришат доколку е потребно.
Поддршка за креирање и чување на клучеви имаат сите моментално користени платформи, односно корисниците можат да ги креираат на Windows, macOS, Android, iOS, Linux.
