За корисниците на Windows Phone платформата во септември 2014 година се појави Opera Mini beta. Овој популарен Интернет прегледувач за другите платформи се појави во својата бета верзија за да можат корисниците на оваа платформа да го истестираат и да дадат мислење на неговото функционирање.
Како што изјавува самиот Кристијан Урибе од Opera, тие ги следеле коментарите на корисниците кои изјавиле дека сакаат графички редизајн на прегледувачот. Затоа, тие ја доставија новата Opera Mini 8 beta со редизајнирано опкружување во стилот на Modern UI, дизајн-концептот на Microsoft.
Редизајнот е чист и овозможува многу опции кои постојат и кај прегледувачите за „обичните“ компјутери, како што се јазичиња за отворање на повеќе различни страници истовремено, додавање на фаворити (преку користење на + копчето), лента која во исто време служи за пребарување и директно отворање страници. Дополнително, постои лента со алатки која доаѓа од доле и која овозможува брз пристап до често користени команди како пристап до фаворитите, историја, симнувања, пребарување на страницата, споделување како и до нагодувањата за работењето на Opera Mini 8.
На празниот екран можете да одберете да пребарувате нешто, да внесете директна адреса или да кликнете некоја страница од тие кои ви се најчесто посетувани односно назначени да се отвораат тука. Инженерите од Opera овие опции успеале да ги сместат во пакет кој тежи само 3 мегабајти, што е навистина импресивно.
Инаку Opera Mini е инсталирана на многу платформи, меѓу кои Android, iOS, BlackBerry, Bada и Windows Phone, и е користена од 250 милиони корисници. Ако имате уред со Windows Phone платформата ви препорачуваме да го инсталирате и испробате овој прегледувач кој е меѓу најдобрите за мобилни уреди.
Извор: Opera Blog, Windows Central, Windows Phone Store
