Apple штотуку го претстави Apple Creator Studio, нов пакет кој ги обединува сите моќни алатки за видео, аудио и графички дизајн од компанијата на едно место. Наместо да купувате посебни лиценци за секој уред, Apple оди на проверената карта со претплата, нудејќи им на креативците целосен екосистем кој работи беспрекорно на Mac и iPad.
Дел од Apple Creator Studio се веќе познатите апликации од компанијата, но сега го гледаме и резултатот од купувањето на познатата компанија Pixelmator.
Apple Creator Studio доаѓа со месечна претплата од 12,99 долари, а дел од пакетот се вклучени:
Видео продукција (Final Cut Pro): Професионална монтажа која сега е уште посилно интегрирана со iPad, овозможувајќи ви да започнете проект на таблет, а да го завршите на компјутер.
Аудио продукција (Logic Pro): Стандардот за музичка продукција и дизајн на звук, со нови AI функции за паметно совпаѓање на ритам и синтеза на звук.
Графички дизајн (Pixelmator Pro): Изненадувањето во пакетот е вклучувањето на Pixelmator Pro, кој за првпат доаѓа и во целосна верзија за iPad, фокусирана на обработка на фотографии и векторски дизајн со помош на Apple Pencil.
Визуелни ефекти и помошни алатки: Тука се и Motion за анимации, Compressor за креирање на видео и MainStage за живи настапи.
Паметна продуктивност: Претплатата вклучува и премиум AI функции во Keynote, Pages и Numbers, што значи полесно креирање презентации и документи со генерирање слики и текст директно во апликациите.
Со овој потег, Apple влегува во директна конкуренција со Adobe Creative Cloud. Додека Adobe со години е неприкосновен лидер во индустријата со Premiere Pro, Photoshop и After Effects, нивната претплата е често критикувана како скапа и софтверот како „тежок“ за системот.
Apple тука ја користи својата најголема предност: оптимизацијата. Нивните апликации работат многу побрзо на Apple чиповите (M1, M2, M3…) во споредба со софтверот на Adobe. Исто така, со цена од 12,99 долари месечно, Creator Studio е драстично поевтин од комплетниот пакет на Adobe, што го прави исклучително привлечен за „freelance“ креативците и „јутјуберите“.
Покрај Adobe, Apple индиректно го напаѓа и Canva пазарот преку новите AI функции во Keynote и Freeform, нудејќи им на почетниците брзи алатки за дизајн кои не бараат длабоко предзнаење.
Apple Creator Studio не е само нов пакет, туку и стратешки потег за да се затворат професионалците во сопствениот екосистем. Ако веќе користите Mac или iPad за работа, овој пакет е веројатно најлогичната (и најисплатливата) инвестиција што можете да ја направите.
