Минатиот месец неофицијално беше пуштена информацијата дека од Intel планираат да ја тргнат една од најпознатите ознаки на пазарот, ознаката „i“. Како што најчесто и излегува, информациите се покажаа како точни, па од компанијата официјално ја најавија оваа промена.
Почнувајќи од Meteor Lake, односно наредната генерација процесори од компанијата, истите веќе нема да ја имаат ознаката „i“ во нивните имиња, па едноставно ќе бидат нарекувани Intel Core 3, 5, 7 и 9.
Уште поголема новина е воведувањето на нов бренд кај овие процесори, а тоа е Ultra брендот. Ultra ознаката ќе биде додадена на процесорите од Intel Core серијата, а ќе означува процесори кои ќе бидат понапредни, кратко кажано и очекувано.
Тоа значи дека покрај Intel Core 3, 5, 7 и 9, достапни ќе бидат и Intel Core Ultra 5, 7 и 9, односно првата категорија, Intel Core 3, нема да има и Ultra варијанта.
За Meteor Lake, кои треба да бидат претставени подоцна годинава, се најавува поголем скок во перформансите и ефикасноста поради воведување на Intel 4 процесот, како и за првпат посебен дел за вештачка интелигенција, Intel AI Boost.
