Microsoft и SwiftKey денеска објавија дека двете компании имаат постигнато договор со што SwiftKey станува дел од Microsoft. Информации за вредноста на договорот не е објавена, но се верува дека може да изнесува и до 250 милиони долари.
Со ова Microsoft продолжува да купува компании коишто стојат зад развојот на некои од најпознатите апликации и сервиси на Android и iOS. Изминатите година дена дел од компанијата станаа Acompli, една од најпознатите email апликации, како и Sunrise календар апликацијата и слично.
SwiftKey е една од најпознатите апликации коишто ја менуваат стандардната тастатура во оперативниот систем. Веќе одамна достапна на Android, од минатата година стана достапна и на iOS.
Покрај одличните можности за прилагодување на самата тастатура, SwiftKey сепак најмногу е позната по алгоритамот за предвидување на наредниот збор, којшто беше унапреден да користи неврална мрежа за уште подобро предвидување.
Тимот од SwiftKey преминува во Microsoft каде што ќе продолжи да работи на развојот на својата технологија. Тоа значи дека апликациите достапни на Android и iOS ќе продолжат да бидат развивани, а технологијата ќе биде пренесена и на тастатурата во Windows.
Би било добро покрај технологијата за предвидување, во Windows да бидат пренесени и некои од можностите за прилагодување на тастатурата, како можноста за менување на нејзиниот изглед.
Купувањето на вакви компании е дел од новата политика на Microsoft. Тие сепак се софтверска компанија и би било логично некои од најдобрите решение на пазарот да доаѓаат од нив, па без разлика дали за тоа е потребно купување на некоја компанија.
Голема улога во оваа политика има и фактот што делот којшто се повеќе станува популарен кај корисниците, а тоа се мобилните уреди, Microsoft се’ уште на него не може да стане доволно сериозен фактор.
