Thunderbird официјално го доби својот долго време потребен редизајн, најавуван уште од минатата година. Како што беше најавено, покрај промената на корисничкиот интерфејс, направена е голема промена на кодот, а тука е и промената на функционалноста на овој имејл клиент.
Заедно со новото лого претставено во мај оваа година, Thunderbird сега може да се каже дека е целосно модернизирана апликација која ќе може без проблем да им конкурира на останатите.
Листата на новини кај Thunderbird 115 е голема, но тоа што веднаш се забележува е новиот кориснички интерфејс. Истиот сега е во рамките на модерните стилови, веќе не изгледа застарено, а заедно со тоа доаѓаат и доста практични подобрувања.
На левата страна е додадена лента од каде може да се пристапи до имејл пораките, календарот, контактите и слично, по што следат трите колони препознатливи за ваквите апликации.
Целосната листа на новини може да се најде на овој линк.
За почеток, Thunderbird 115 не е достапен како надградба за постојните корисници, односно тие не можат класично да проверат за нови верзии и да ја инсталираат новата. Поради големата промена во кодот и изгледот, од Thunderbird ќе остават уште одреден период пред да го надградат сите нивни корисници на новата верзија.
Корисниците како и да е можат да ја симнат новата верзија која веќе е достапна на страната од Thunderbird. Истата е достапна за трите платформи, односно за Windows, macOS и Linux.
