Volvo Cars најави дека тие се целосно посветени на брзо растечкиот пазар на електрични возила и дека планираат да станат лидер на овој пазар. Планот е да до 2030 година овој производител продава само електрични возила, со што ќе престане да ги има во својата понуда бензинските, па и хибридните модели.
До 2025 година Volvo планира да половината од понудата биде со електрични модели, додека останатите да бидат хибридни.
Интересно, тие најавија и дека продажбата на електричните автомобили, кои ќе бидат единствени во понудата до 2030, ќе се продаваат само онлајн преку нивната страна. Тоа значи дека тие веќе нема да ги нудат своите автомобили преку дилерите, а купувачите покрај онлајн, ќе можат да ги разгледуваат и пробуваат моделите на посебни настани, како и салони од компанијата.
„За да останеме успешни, потребен ни е профитабилен раст. Затоа, наместо да инвестираме во бизнис кој се намалува, ние бираме да инвестираме во иднината – електрична и онлајн. Ние сме целосно фокусирани кон станувањето лидер на брзо растечкиот премиум електричен сегмент“. – истакна Хакан Самјуелсон извршниот директор на Volvo Cars.
Од компанијата исто така најавија дека подоцна во денот планираат да го претстават својот втор целосно електричен модел од серијата 40.
Volvo не може да се каже дека се нешто посебни со најавата на овој план. Повеќето производители веќе најавуваат исти или слични планови, па на крај само ќе има разлика во тоа кој побрзо ќе ја постигне својата трансформација кон целосно електрични автомобили.
