Според најнови протечени информации, Microsoft дефинитивно работи на Surface Phone, смартфонот кој ќе се придружи на успешната серија на таблет – лаптопи. Сепак, на него нема да работи тимот што досега работеше на Lumia уредите, туку целосно ќе биде преземен од тимот на Панос Панај.
Сигурно веднаш се прашавте кој е Панос Панај – тоа е човекот кој на презентацијата на новите Surface Pro 4 и Surface Book буквално го раздрма светот на таблетите и лаптопите, правејќи многумина од нас, кои досега не сме размислувале за таблет со Windows 10, да посакаме да го имаме.
Тоа што тимот на Панај ќе работи на овој уред секако е одлична вест. Тие досега се покажаа како исклучително иновативни, носејќи решенија кои го придвижуваат цел сегмент напред. Кај Surface Phone секако може да им помогне Continuum можноста, со која кога ќе го поврзете телефонот на поголем дисплеј, добивате функционален Windows 10 компјутер, па затоа дефинитивно ќе биде интересно да видиме што спремаат и какви нови идеи имаат.
Она што ќе го разликува Surface Phone од Lumia понудата пак ќе биде процесорот на Intel (се спомнува и M серијата, која е исклучително моќна), кој за разлика од Snapdragon сериите, може да пушта и нормални Win32 програми, истите оние што можете да ги инсталирате на вашиот Windows компјутер.
Иако овие програми не се развиени за работа на мали екрани или пак за работа без маус и тастатура, секако дека би можеле да се користат со Continuum можноста како целосна замена за компјутер. Во превод, Surface Phone повеќе ќе функционира како целосен компјутер, отколку како телефон.
Оваа информација не е директно потврдена од Microsoft, односно е на ниво на гласина, што значи дека не можеме да бидеме 100% сигурни дека Surface Phone ќе го доживее светлото на денот. Сепак, после големиот успех на Surface серијата, особено во бизнис секторот, Microsoft не би смеел да ја пропушти приликата за ваков уред.
Извор: Ubergizmo, TechRadar, Windows Central
