Минатата година Microsoft ја донесе својата одлична Phone Link апликација на iOS и со тоа им овозможи на корисниците на iPhone некаква „handoff“ функционалност каква што би имале со Mac компјутер.
Очекувано, апликацијата е далеку од функциите кои се достапни за Android смартфоните, но сепак им овозможи на корисниците проверка на известувањата, правење на повици, како и одговарање на пораки.
Сега за корисниците на Windows Insider, Microsoft започна со пуштање на можноста за споделување на датотеки помеѓу iPhone и Windows 11 или Windows 10 компјутер. Со оваа можност може да се каже дека апликацијата станува навистина корисна, па корисниците на iPhone „не мора“ да купат Mac или па Android смартфон за да ги добијат ваквите функции.
Не е познато кога оваа новина може да се очекува за сите корисници, но според досегашното искуство, штом работите стигнат од Windows Insider, чекањето е најмногу неколку месеци.
