Се работи за тестирање на функција на ограничен број на корисници, моментално од САД. Од Facebook ја имаат потврдено информацијата, меѓутоа не е познато дали и кога оваа можност би станала достапна за сите корисници.
Функцијата вклучува можност за пребарување на огромниот број на линкови споделени на социјалната мрежа. Facebook врши индексирање на овие линкови со цел корисниците да можат да ги пребаруваат.
Тоа значи дека кога сакате да споделите некој линк, нема да мора да го барате истиот за да го ставите во делот за објава. Со новата функција се што треба е да почнете да внесувате клучни зборови, па предлози ќе почнат да се појавуваат од достапните линкови на мрежата.
Со други зборови, ова претставува директна конкуренција на Google, во правец на стратегијата на Facebook корисниците што поретко да ја напуштаат страната на социјалната мрежа. Пребарувањето на одредени статии, видеа и слични линкови, наместо корисниците да го прават преку Google, сега ќе можат да го прават преку Facebook, се разбира под услов линкот да бил споделен на мрежата.
Оваа функција најверојатно ќе биде наменета за мобилните верзии од Facebook, каде што и е потребно повеќе време за пронаоѓање и споделување на одреден линк.
Пребарувањето на линковите ќе биде додадено на самиот дел за споделување на новости, поточно како копче до другите за слики и слични објави.
Корисниците исто така ќе имаат можност и за проверка на содржината од линкот пред истиот да го вклучат во нивната објава.
Извор: TechCrunch
