OneDrive апликацијата за корисниците на Windows Phone е надградена на нова верзија која што меѓу другото вклучува е променет дизајн. Новиот дизајн слободно може да се каже дека многу повеќе наликува на верзиите од апликацијата на другите платформи. Дизајнот до некаде излегува од досега користениот Windows Phone стил, но сепак го задржува рамниот дизајн стил, а според нас апликациите вака и подобро изгледаат.
Наместо само можноста за менување на содржината со повлекување лево и десно, апликацијата сега вклучува мени кое што се појавува од левата страна со притискање на новото копче во горниот агол. Исто така, горната страна сега вклучува сина лента која што и дава на апликацијата конзистентен изглед со другите платформи.
Покрај промената на дизајнот, апликацијата вклучува подобрување на перформансите, како повеќе додатоци за корисниците на бизнис сметки. Па така, OneDrive за Windows Phone сега вклучува:
- Поддршка за OneDrive for Business
- Најавување заедно со личната и бизнис сметка
- Организирање и отворање на фајловите од бизнис сметката
- Зачувување на фајлови во бизнис сметката
- Лесно испраќање на фајлови од бизнис сметката
Апликацијата е достапна за сите корисниците на Windows Phone 7.5, 8 и 8.1 и може да се надгради преку продавницата за апликации, доколку веќе не е автоматски надградена.
Извор: WPCentral
