Ова дефинитивно го чекавме повеќе од деценија – Skype отсега ќе може да се користи и преку вашиот прелистувач, што значи дека нема да има потреба ниту да го инсталирате во компјутерот.
Ова е многу погодно за оние со постари компјутери, кои имаат малку ресурси, но и за Chrome OS и Linux оперативните системи, каде уште од лансирањето недостасуваше Skype апликација. Skype Web секако ќе биде бесплатен за користење и ќе работи на сите компјутерски оперативни системи, како и на сите популарни прелистувачи – Chrome, Firefox, Safari, Internet Explorer и веројатно и Microsoft Edge кога ќе биде достапен.
Веб верзијата ќе ги има сите можности што ги има и десктоп програмата, освен за Chrome OS корисниците, кои засега ќе можат да ги користат само текстуални пораки, без можност за повици. За разлика од многу вакви други веб решенија (како на пример Messenger за Facebook), Skype нема да бара инсталирање посебни плагини за користење на камерата и микрофонот и уште во старт е подготвен за користење.
Сепак, бидејќи и натаму се работи за бета верзија, доколку сакате да вршите повици кон телефонски број, мора да имате инсталирано соодветен плагин, нешто што се очекува да биде решено во официјалната верзија. А како и десктоп варијантата и веб верзијата на Skype уште сега има десктоп нотификации.
Skype Web можете да го пробате на следниов линк.
Извор: The Next Web, Slash Gear
