Пазарот за „2 во 1“ лаптопи, кои имаат дисплеј кој може да се сврти за 360 степени продолжува да се зголемува. Најновиот натпреварувач доаѓа од Asus и се вика ZenBook Flip UX370, а за него компанијата тврди дека е најтенкиот лаптоп од овој тип на пазарот.
Колку тенок? Само 10,9 милиметри, што е извонредно постигнување, а особена тежина на овој податок оддаваат спецификациите. За разлика од многу други тенки модели, ZenBook Flip UX370 има моќен Core i7 7500-процесор, помогнат од максимум 16 GB рам меморија и 1 TB супер брз SSD диск. Лаптопот е опремен и со две USB Type-C порти, што со оглед на димензиите е одлична вест – некои лаптопи сѐ уште имаат само една Type-C порта (кхм, MacBook, кхм).
Asus ZenBook Flip UX370 може да се пофали и со врвен дисплеј со големина од 13,3 инчи. Тој има резолуција од 3480х2160 пиксели, што значи дека е 4K Ultra HD, а околу него има и прилично мала рамка од само 6,1 милиметар. Дисплејот поддржува и дигитално пенкалце Asus Pen со сензитивност од 1.024 нивоа на притисок, кое нормално функционира со Windows Ink во Windows 10.
За да биде се на највисоко ниво, Asus се погрижил со изработката од алуминиум кој се употребува во авио индустријата и благодарение на кој овој лаптоп тежи само 1,1 килограм.
Цената на Asus ZenBook Flip UX370 ќе изнесува 1.099 долари за почетниот модел, што и не е премногу кога ќе се соберат сите карактеристики на овој модел.
Извор: CNET, TechRadar, Laptop Mag
