Qualcomm уште минатата година започна со тестирања на нивниот нов Snapdragon X Elite чип кој е повеќе од добредојден во светот на Windows компјутерите. Овој ARM чип ќе донесе компјутери со перформанси и потрошувачка како MacBook серијата од Apple, со што конечно ќе видиме вистинска и сериозна конкуренција на овој план.
Минатата година споредбата беше направена со М3 чипот од Apple, па Qualcomm истакна дека нивниот Snapdragon X Elite е побрз. Ова посебно доаѓа до израз кога се користи повеќе енергија, нешто што е можност кај чипот од Qualcomm.
Од компанијата споредбата ја направија и со чипови од Intel и AMD, а секако Snapdragon X Elite е победник во сите тие тестови.
Со оглед на тоа што споредбата минатата година беше направена со постарата серија од Intel, сега од компанијата објавија дека направиле споредба и со новата Intel Core Ultra серија. Оваа серија донесува нова архитектура и начин на поставување на јадрата од процесорот, па истата функционира повеќе слично со ARM конкурентите.
Споредбата е направена со Intel Core Ultra 7 155H и Core Ultra 9 185H со познатата Geekbench 6.2 апликација. Двата чипови имаат по 16 процесорски јадра и работат на слична фреквенција.
Snapdragon X Elite има околу 50% подобри перформанси од двата чипови, а доколку перформансите се прилагодат да бидат исти, тогаш чипот троши околу 65% помалку енергија.
Ќе биде интересно оваа година, па баш ме интересира кога ќе почнат да излегуваат реални тестови од компјутери кои се достапни во продажба, а посебно ме интересира споредбата со посилните М3 Pro и Max верзии од чиповите на Apple.
