Една од најголемите вести при лансирањето на Windows 10 оперативниот систем беше универзалната платформа за апликации, односно UWP. Според Microsoft, оваа платформа требаше да го зајакне Windows на десктоп компјутерите, но и да му даде шанса за успех на Windows 10 Mobile, кој исто така требаше да ги користи овие апликации.
Сепак, работите не испаднаа како што Microsoft очекуваше и причината за тоа најверојатно е токму Windows 10 Mobile. Имено, многу од јавноста, па и дивелоперите, UWP платформата ја сфатија како начин да можат да објават мобилни апликации на десктоп Windows 10. Всушност, поголемиот дел од апликациите во Windows Store денес се само изменети верзии на мобилните апликации.
А како оперативен систем со многу малку апликации (релативно споредено со Android и iOS), Windows 10 Mobile не можеше ни одблизу да го збогати искуството на десктоп кое сѐ уште го нудат стандардните Win32 програми. Затоа, на Microsoft му треба нова стратегија за промовирање на UWP, како начин Win32 програмите да почнат да се нудат на Windows Store, бидејќи еко системот со Win32 апликации е и натаму најбогат во светот.
Затоа, на Build конференцијата која ќе се одржи наредната недела, можеме да очекуваме Microsoft да направи нов атак со UWP апликациите, но заедно со тоа и скоро целосно да го згасне Windows 10 Mobile. Очекувајте многу десктоп програми, како на пример целосниот Office 2016 и дури и некои од други дивелопери. Всушност, Windows 10 S оперативниот систем беше само најава за ова.
Исто така, со UWP Microsoft има за цел да ги привлече и дивелоперите од останатите еко системи и одличен пример за тоа е популарната djay Pro апликација од iOS, која е префрлена во Windows 10 со целосна функционалност, вклучувајќи го и Surface Dial. Затоа, оваа апликација денес е подеднакво популарна на Surface уредите и сличните на нив, како што е популарна и на iPad.
Потоа, доколку овој потег успее (а има реална шанса), Microsoft може да почне да размислува за преселување на истите апликации и на мобилната верзија на Windows 10. Но за разлика од сега, тогаш разликата ќе биде што апликациите веќе ќе бидат исклучително квалитетни и моќни, всушност какви што се сега Win32 програмите за Windows.
Извор: Windows Central, Windows Report
