Софтверскиот гигант спрема голем настан во Октомври, на кој ќе претстави неколку нови уреди, за прв пат откако почна да произведува хардвер. За неколку од нив сме сигурни, но има и неколку шпекулации за нови производи.
Најважното претставување веројатно ќе биде на новиот Surface Pro 4, таблет – лаптопот кој во третата генерација беше прилично успешен, со продажни резултати кои не ги очекуваше ниту Microsoft. Новиот модел ќе има процесори од Skylake генерацијата, кои треба да донесат помала потрошувачка на енергија и подолго траење на батеријата, како и мали подобрувања во перформансите. Однадвор, не би требало да има многу разлика во однос на овој модел, освен веројатно мало намалување на дебелината.
За двата телефони од високата класа, Lumia 950 и 950 XL веќе зборувавме неколку пати претходно. Се работи за првите телефони кои ќе бидат претставени со Windows 10 Mobile, а ќе имаат моќни спецификации и за прв пат кај паметните телефони, скенер за зеницата на очите, кој ќе го отклучува телефонот со помош на Windows Hello.
Microsoft исто така ќе го претстави и новиот фитнес уред Band 2, кој ќе донесе помали димензии и треба да биде многу попријатен за носење, иако и натаму ќе има цела плејада на сензори за мерење на состојбата на организмот. Иако се очекуваше, Band 2 веројатно нема да има вграден Windows 10, туку само екстензија на оперативниот систем.
Покрај овие четири уреди, кои сигурно ќе бидат претставени на настанот, има шпекулации дека Microsoft ќе претстави и тенка верзија на Xbox One конзолата, како и помала верзија на Surface таблетот со екран под 10 инчи. Има и некои информации дека Microsoft ќе претстави и Surface телефон, со Intel процесор, на кој ќе може да работат и старите Windows програми, но тоа е многу малку веројатно.
