Што ќе се случи доколку го извадите “Home” копчето на iPhone и читачот за отпечатоци на прсти го ставите во задниот дел? Vivo X6! И X6 Plus секако, бидејќи и кај S моделите на Apple има Plus модел.
Дизајнот однадвор неодоливо потсетува на новите iPhone 6S и 6S Plus, со скоро подеднаков заден дел. И двата модели имаат дебелина од само 6,6 милиметри, која треба да придонесе за луксузен изглед, заедно со целосната алуминиумска изработка во задниот дел и од страните. Од Vivo велат дека сечењето на алуминиумот се врши со ласер, лепењето со нано лепак, а завршната обработка се врши рачно.
И повторно, знам дека сум досаден, но исто како кај новите iPhone-и, разликата кај двата модели е главно во големината на дисплеите – 5,2 инчен Super Amoled Full HD кај Х6 и 5,7 инчен Super Amoled Full HD кај Х6 Plus. Малку поголеми од смартфоните на Apple, но поентата е таа.
Спецификациите не се најмоќни на пазарот, но се прилично близу. Процесорот е MediaTek MT6752, кој има осум Cortex-A53 јадра кои работат на 1,7 Ghz. Овие јадра треба да понудат солидни перформанси, но се далеку од Cortex-A57 јадрата, кои се користат во најмоќните чипови, а графиката е Mali T760. Од друга страна и двата телефони имаат 4 GB рам, што значи дека веројатно никогаш нема да има потреба да гасите апликации.
Покрај разликата во големината на екраните, поголемиот модел ќе има 64 GB простор за складирање податоци, наспроти 32 GB за помалиот модел. X6 Plus ќе има и поголема батерија – 3000 наспроти 2400 mAh. И двата модели имаат задна камера со 13 мегапиксели и предна со 8, но само поголемиот модел има специјален Hi-Fi аудио засилувач од Yamaha, кој треба да придонесе за многу помоќен звук кога ќе слушате преку слушалки. И двата модели ќе доаѓаат со вграден Android Lollipop 5.1 со Funtouch скин над него, а ќе имаат и Dual SIM можност.
Цените на Vivo X6 и X6 Plus не се ниски како што би очекувале од еден кинески смартфон – помалиот модел чини 385, додека поголемиот 475 евра. Да, поповолно е од многу смартфони на етаблираните конкуренти од високата класа, но има премногу компромиси во спецификациите, иако телефоните навистина изгледаат iPhone-овски луксузно.
Извор: Android Authority, GSMArena
