Adobe Photoshop Express доколку не сте запознаени е апликација наменета за работа со слики на вашиот мобилен телефон, која што овозможува одредени основни филтри и функции. Иако го носи името Photoshop, не треба да биде споредувана со главната и позната апликација за десктоп компјутерите. Се разбира дека повеќе и не би ви било потребно на вашиот мобилен телефон, па така оваа апликација е една од најпознатите во својата категорија.
Достапна веќе одамна за корисниците на Android и iOS, како и веќе една година за Windows 8, од вчера и корисниците на Windows Phone 8 може да се пофалат со оваа апликација. Постојат голем број на други апликации за промена на сликите на сите платформи кои за голем број од корисниците се можеби и подобри од оваа, но сепак апликација која што го носи името на Adobe сигурно заслужува внимание.
Апликацијата ги вклучува функциите кои што се достапни во нејзините верзии на другите платформи, од кои што повеќето се бесплатни, а достапни се и неколку додатни кои што може да се користат со нивно посебно купување преку апликацијата. Adobe Photoshop Express за Windows Phone 8 ги вклучува следните функции:
- Основни: сечење (crop), исправување, ротирање, превртување, како и отстранување на red eye од сликите
- Автоматско – поправање: Автоматско прилагодување со притискање на едно копче на осветленоста, изложеноста и сенките на сликата
- Боја: Лизгачки контроли со кои што можете да ја прилагодувате излеженоста, контрастот, чистината, живоста и повеќе
- Филтри „Looks“: Достапни се повеќе од 20 филтри (како во Instagram), како и дополнителни 20 кои што може да се докупат по цена од 2,99 долари
- Можност за докупување на Noise reduction пакет по цена од 4,99 долари
- Споделување на сликите на социјалните мрежи, како и преку SMS
Апликацијата е достапна во продавницата за апликации и можете да ја симнете преку следниот линк.
