Првично забележано од страна на корисниците, потоа е потврдено од страна на Google за Android Authority. Од компанијата ги затвораат пропустите кои овозможуваат гледање на YouTube во позадина без Premium претплата, преку неколку интернет прелистувачи кои тоа го овозможуваат.
Вакво нешто овозможуваат прелистувачите како Brave, Vivaldi, па дури и Edge, но очекувано на Google тоа не им се допаѓа затоа што овие корисници можеби би морале да се претплатат на YouTube Premium доколку не им се достапни вакви „пропусти“.
YouTube Premium е месечна претплата која како главна предност која ја нуди е тргањето на огромниот број на реклами кои се прикажуваат на овој познат сервис.
Сепак, за претплатниците се достапни уште цела листа на функции, а една од нив е и можноста видеото да продолжи да функционира дури и ако апликацијата се тргне во позадина или ако се заклучи телефонот.
Од Brave преку X објавија дека тие веќе го решиле проблемот, па корисниците повторно можат да ја користат функцијата на YouTube, но станува очигледно дека од Google се решени целосно да ја прекинат оваа практика.
„Репродукцијата во позадина е функција наменета да биде ексклузивна за членовите на YouTube Premium. Иако некои корисници кои не се Premium можеби претходно можеа да пристапат до ова преку мобилни веб-прелистувачи во одредени сценарија, го ажуриравме искуството за да обезбедиме конзистентност на сите наши платформи.“ – изјавуваат од Google за Android Authority.
