Google започна со дистрибуција на ново ажурирање за прелистувачот Chrome наменето за Android уредите со поголеми екрани, како што се таблетите и смартфоните на преклоп. Со оваа надградба, корисниците ја добиваат лентата со нивните омилени страни, која е добро позната од десктоп верзијата на прелистувачот.
Целта на оваа промена е да се олесни и забрза навигацијата, овозможувајќи им на корисниците директен пристап до нивните најчесто посетувани веб страни без потреба од отворање дополнителни менија.
Новата лента со омилените страни е поставена веднаш под лентата за адреси. Секоја зачувана страница е прикажана со нејзиното лого и име, а поддржани се и папки кои се отвораат директно во самата лента.
Доколку корисникот има повеќе зачувани страници отколку што дозволува просторот на екранот, на десната страна се појавува стрелка која овозможува прегледување на останатите страни.
Оваа функционалност е специфично дизајнирана за уреди кои нудат поголема широчина на екранот. Поради тоа, лентата е достапна само за таблети и телефоните на преклоп кои се отвораат во формат на книга.
За да се користи новата лента со омилени страни, потребно е уредот да ја има инсталирано верзијата 146 на Chrome. Функцијата се активира преку поставките на прелистувачот, со избирање на менито за изглед каде што се вклучува опцијата за приказ на лентата.
