Очекувано, изминатиот период можевме да видиме претставување на неколку нови прелистувачи, од компаниите кои работат на развој на генеративна вештачка интелигенција. Тука треба да се додадат и ВИ функциите и режимите кои се додаваат на веќе постојните прелистувачи, меѓу кои и Chrome и Edge.
Уште веднаш може да се заклучи дека овие прелистувачи ќе бидат голем проблем за приватноста на корисниците, нешто што никогаш не беше решено, а сега дополнително се намалуваат шансите за тоа.
Покрај ова, од Brave истакнуваат конкретни примери за безбедносниот ризик кој го претставуваат вакви прелистувачи, а објавија и конкретни примери со докази за истото.
Тие истакнуваат дека за откриените слабости се информирани компаниите кои стојат зад прелистувачите, па би требало да најдат некакви решенија.
Од Brave објавија две статии досега, а најавуваат уште. Двете се однесуваат за можноста на вметнување на упатства за вештачката интелигенција кои во основа би ја искористиле функцијата за отворање на страните во име на корисникот.
Во едниот случај инјектирањето на упатствата се прави преку слики од екранот кои се пуштаат на ВИ да ги анализира, а другиот е преку инјектирање на упатства преку скриен текст на веб страните.
Двата начини на „искористување“ на прелистувачите со вештачка интелигенција е толку лесен и очигледен, што е чудно што од компаниите уште од почеток не размислувале за потенцијално решение и заштита од истите.
Во основа, овие слабости се најистакнати при користење на агентските способности на вештачката интелигенција, односно можноста за отворање на страни во име на корисникот, резервации, нарачки и слично.
