Microsoft не планира да се откаже од својата цел да ја купи една од најпознатите компании за игри, Activision Blizzard. Главен кочничар на овој договор остана само британската CMA, чија главна грижа е влијанието на пазарот на стриминг на игри.
Со цел конечно да ги тргне забелешките на CMA, кои продолжија со блокирањето на договорот, Microsoft сега излезе со нов предлог до институцијата. Новиот предлог подразбира префрлување на правата од игрите на пазарот на стриминг на игри на друга компанија, поточно на познатата Ubisoft.
Оваа компанија би ги имала правата на игрите од Activision Blizzard, сите досегашни и во иднина, во наредните 15 години. Microsoft не би имал одлука за тоа каде би биле достапни игрите, а со тоа не би можеле да ги направат ексклузивно достапни само на нивните платформи.
CMA поради ова отвори нова истрага за договорот која планира да заврши до 18 октомври, новиот рок кој го договорија Microsoft и Activision Blizzard за извршување на зделката.
Со оглед на тоа што главната забелешка на CMA е пазарот на стриминг на игри, со овој нов предлог би требало да дадат дозвола за ивршување на договорот, но ќе видиме дали тоа ќе биде така.
