Apple вчера ги објави првите „Background Security Improvements” (BSI) ажурирања за iOS 26.3.1, iPadOS 26.3.1, macOS Tahoe 26.3.1 и macOS Tahoe 26.3.2. Станува збор за нов механизам за безбедносни исправки кој го заменува претходниот систем на „rapid security updates” што компанијата го користеше претходните години.
Конкретниот пропуст што е адресиран се наоѓа во WebKit, „моторот“ што го користи Safari и секој друг прелистувач на Apple уредите. Ранливоста, овозможувала малициозно креирана веб содржина да ја заобиколи „Same Origin Policy”, еден од клучните безбедносни механизми на веб прелистувачите кој спречува страниците да пристапуваат до податоци од други домени. Проблемот конкретно се наоѓал во Navigation API, а Apple го решил со подобрена валидација на влезните податоци.
„Background Security Improvements” беа воведени со iOS 26, iPadOS 26 и macOS Tahoe, а Apple ги тестираше во претходните 26.3 верзии пред вчерашното официјално пуштање. Овие ажурирања се наменети за обезбедување дополнителна заштита помеѓу стандардните софтверски ажурирања, конкретно за Safari, WebKit и други системски библиотеки.
За инсталација, корисниците треба да отидат во Privacy and Security делот од Settings, па Background Security Improvements и да притиснат „Install”. Доколку е вклучена опцијата „Automatically Install”, ажурирањата ќе се инсталираат автоматски.
Оние кои нема да ги инсталираат BSI ажурирањата, ќе ги добијат истите исправки во наредното стандардно софтверско ажурирање.
