Редизајнот на OneDrive кој Microsoft го најави во октомври минатата година, сега почнува да им станува достапен на корисниците. Се мисли на веб верзијата од сервисот, а истата постепено ќе биде пуштана се до крајот на месецот кога сите корисници ќе ја добијат.
Новиот дизајн на OneDrive е доволно голем, па веднаш се забележуваат разликите. Покрај корисничкиот интерфејс, сервисот добива и функционални промени, па корисниците можат да очекуваат побрза работа и повеќе интуитивна поставеност на елементите.
Дизајнот е направен во стилот на Windows 11, односно Fluent дизајнот од компанијата кој вклучува доста проѕирни делови и е доволно едноставен за лесно користење.
Што се однесува до функционалните промени, OneDrive додава неколку нови делови кои ја олеснуваат работата, односно пронаоѓањето на датотеките.
Првата е „People“ делот, кој овозможува поделба на датотеките според тоа кој корисник ги има споделено. Од Microsoft добро истакнуваат дека корисниците многу често паметат кој им има испратено датотека, но не и кое е името на истата, па на овој начин многу полесно ќе можат да го најдат тоа што го бараат.
OneDrive исто така добива и брз пристап до филтри, па во листата со датотеки многу полесно ќе може да се избере прикажување само на Word датотеки или тие од Excel, PowerPoint и слично.
Достапни се и повеќе други мали промени кои активните корисници на сервисот ќе ги забележат во тек на користењето.
