Уште со претставувањето на Windows 8, уредите „2 во 1“ почнаа да се множат на пазарот, но со новата 10-ка, како и новите Skylake процесори на Intel, можеме да очекуваме уште многу нови решенија и подобри перформанси. Најновиот Satellite Radius 12 модел на Toshiba, има 12,5 инчен екран кој може да се сврти 360 степени за да се користи како таблет, а има и модел со 4K резолуција.
Во внатрешноста ќе чука срцето на новата Skylake “i” серија на процесори на Intel, почнувајќи од Core i3, преку Core i5 и Core i7 во најмоќниот модел. Лаптопот ќе може да се опреми со максимум 8 GB рам меморија, како и SSD дискови од 128, 256 и 512 GB. Во оптек се дисплеи со Full HD (1920×1080) и 4K Ultra HD резолуција (3840х2160).
Сепак, вакви можности ќе имаат многу други ултра тенки лаптоп/таблети и она што ќе ја разликува оваа Toshiba од другите, е инфрацрвената камера, која ќе го отклучува компјутерот читајќи ги лицето и очите на корисникот, а со помош на Windows Hello.
Лаптопот инаку има USB Type-C порта, како сите модели од последната генерација, но ќе има и две USB 3.0 порти. Тежи 1,3 килограми, што го прави еден од најлесните „2 во 1“ уреди, а има дебелина од само 15 милиметри.
Извор: Windows Central, The Verge
