Microsoft ја најави оваа новина минатата есен, а сега го потврди точниот период кога може да се очекува. Copilot ќе стане дел од OneDrive за бизнис корисниците при крајот на идниот месец, односно при крајот на април.
Корисниците ќе треба да имаат Copilot for Microsoft 365 лиценца за да можат да го користат овој „асистент“ и во OneDrive до кого ќе може да се пристапи преку веб, како и преку делот за датотеки во Microsoft Teams, OneDrive и SharePoint.
Додатокот на Copilot во OneDrive е можеби еден од подобрите примери за корисност на интеграцијата на генеративната вештачка интелигенција која Microsoft ја „бутна“ секаде изминатите година дена.
Copilot на корисниците ќе може да им скрати доста време барајќи одредени документи, но уште поважно и корисно, ќе може да ги анализира, сумира документите, да креира нови и многу повеќе.
Microsoft дава примери за што е тоа што корисниците ќе можат да го побараат од Copilot, па еве неколку од нив.
- Која е вкупната продажба на пијалаци изминатата недела ? Стави го одговорот во табела со преглед по денови
- Спореди ги главните разлики помеѓу селектираните датотеки и стави ги разликите во табела
- Кои се предностите и слабостите на проектот „Moonshot“
- Бев на одмор цела недела. Прикажи ми ги најновите датотеки од проектот „Moonshot“
- Кои датотеки треба да ги прочитам за да започнам со работа на проектот „SkyDance“
- Користејќи ја датотеката „sales-enablement.docx“, креирај преглед за презентација за нов клиент
- Креирај листа на често поставувани прашања за проектот „Moonshot“
- Сумирај ги клучните точки од „moonshot-plan.pdf, moonshot-timeline.docx, moonshot-GTM.ppt“.
Достапни се уште доста можности кои ги отвора новата интеграција на OneDrive со Copilot, па останува само прашањето на приватноста, но Microsoft не би требало да ги користи бизнис датотеките за тренирање на нивните големи јазични модели.
