X, а мислам дека веќе не мора да се кажува поранешен Twitter, официјално ги воведе најавените повици преку мрежата. Корисниците сега ќе можат да прават аудио и видео повици, но очекувано, оваа можност е достапна само за Premium претплатниците.
Иако може да се каже дека на корисниците не им е потребна уште една апликација за повици, сепак за тие кои активно ја користат оваа мрежа, може да е добар начин за комуникација, а посебно доколку истата веќе активно се прави преку пораки.
X апликацијата ќе ги информира сите корисници за новата можност, а веднаш ќе биде понудено и прилагодувањето за тоа кој може да ги добие преку оваа мрежа. Достапни се опции како достапност само за корисниците кои се дел од „именикот“, тие кои ве следат, како и само од верификувани корисници.
Можноста за повици може и целосно да се исклучи, па за тие кои сметаат дека тоа не им е потребно и не би сакале да добиваат повици, тука е и оваа опција.
Една од предностите која се промовираше при најавата на оваа можност беше приватноста поради тоа што корисниците нема потреба да го користат својот телефонски број за комуникација.
