CERN е во процес на масовна транзиција на својата контролна инфраструктура за акцелераторите, при што до крајот на 2026 година повеќе од 2.200 индустриски компјутери и вградени системи ќе почнат да користат Debian 13.
Овие машини се дел од комплексот кој се протега на површина од 43 квадратни километри и се директно поврзани со приближно 17.000 уреди. Ова не се стандардни канцелариски компјутери, туку специјализирани системи кои се поставени во близина на опремата и комуницираат со хардверот низ самите капацитети на институтот.
Овој потег означува крај на долгогодишната поврзаност на системите на CERN со екосистемот на Red Hat. Претходно, овие компјутери работеа на Scientific Linux, а подоцна и на CentOS моделите базирани на седмата и осмата генерација на Red Hat Enterprise Linux. Иако првичниот план предвидувал миграција кон CentOS Stream, промената на насоката на овој оперативен систем и предвременото укинување на класичниот CentOS модел го принудија инженерскиот тим да ја избере алтернативата.
Анализата на ризик од вториот квартал на 2023 година покажала дека останувањето на патеката на Red Hat Enterprise Linux би чинело околу 5,4 милиони швајцарски франци поради потребата од редизајн на хардверски плочи, преструктуирање на опремата и ангажирање дополнителен персонал. Дури и со идеални услови, оптимистичката стапка на успешност била проценета на само 20 проценти.
Соочени со краен рок во четвртиот квартал од 2026 година, инженерите на институтот одлучија да имплементираат софтверско решение за овој проблем преку преминување кон Debian. Миграцијата оди подалеку од едноставно инсталирање на оперативниот систем на постоечките машини. CERN моментално редизајнира делови од поддржувачката инфраструктура, вклучувајќи го начинот на кој се дистрибуираат софтверските компоненти, како се подигнуваат компјутерите и како се интегрираат драјверите за специјализираниот хардвер.
Најголемиот предизвик во овој потфат е фактот што верзиите на Linux мора прецизно да се усогласат со ригорозниот распоред на работа на акцелераторите, со цел да се избегнат несакани софтверски интервенции додека акцелераторот на честички е активен.
Видео со кое се најавува и објаснува овој процес може да се погледне тука.
