Со најновото ажурирање на Google Play Services за април, корисниците на Android добиваат новина поврзана со безбедноста, која се очекуваше со пуштањето на Android 16 подоцна во годината.
Се работи за автоматско рестартирање на уредите кои не се користени одреден период, односно не се користени и се заклучени три дена. По истекот на овој период, уредот се рестартира со што истиот се доведува во таканаречената „Before First Unlock – BFU“ состојба.
BFU состојбата прави да е доста потешко, скоро и невозможно да се пристапи до податоците од било кој друг, освен корисникот, поради тоа што не функционираат биометриските начини за отклучување, а податоците се шифрирани.
Корисникот треба да го отклучи телефон, по што тој се враќа во нормално функционирање.
Ваква заштита за корисниците воведе и Apple минатата година со iOS 18.1 надградбата, а истата функционира на истиот начин и со истата цел.
Оваа новина корисниците на Android ќе ја добијат со априлската надградба на Google Play Services, а како и секогаш процесот оди постепено.
