Amazon започна со нова интеграција која овозможува пристап до видеоигри преку нивната платформа за филмови и серии. Сервисот за игри преку „облакот“ кој беше претставен во 2022, Luna, отсега е достапен во рамките на апликацијата Prime Video за корисниците на Fire TV уредите.
Оваа опција моментално е активна само за претплатниците во Соединетите Американски Држави и Обединетото Кралство, што значи дека корисниците во Македонија засега немаат пристап до оваа функција и не е познато дали се планира достапност во иднина.
Целта на овој потег е да се намали бариерата за влез во светот на видеоигрите, овозможувајќи им на луѓето да играат без потреба од скапи конзоли или наменски гејминг компјутери, истакнуваат од Amazon.
Со додавањето на нов дел за игри во интерфејсот на Prime Video, корисниците можат да откриваат и стартуваат наслови на ист начин како што пребаруваат филмови и серии. Игрите се вклучени во постоечката Prime претплата без дополнителни трошоци и за нивно играње не е потребно преземање дополнителни датотеки, а контролата се одвива преку компатибилен контролер или преку паметен телефон.
Библиотеката на Luna нуди различни наслови, вклучувајќи познати игри како Hogwarts Legacy, EA Sports FC 26 и Indiana Jones and the Great Circle, но и друштвени игри наменети за повеќе играчи.
Amazon планира и директно поврзување на видео содржините со соодветни игри, овозможувајќи им на претплатниците да гледаат одреден филм и веднаш потоа да играат игра сместена во истиот универзум.
